Ben Freeth (54), uitvoerende direkteur van die Mike Campbell-stigting, het 800 km te perd afgelê as deel van dié stigting en ander organisasies se veldtog vir die herinstelling van die Suider-Afrikaanse Ontwikkelingsgemeenskap (SAOG) se tribunaal. ’n Memorandum  waarin die betrokke organisasies ’n beroep doen op die herinstelling is na afloop van Freeth se epiese tog aan die SAOG gestuur.

Verteenwoordigers van die Mike Campbell-stigting, die Mthwakazi Republiek Party (MRP), die Suider-Afrika Agri Inisiatief (Saai), AfriForum en die kantoor van Kgosi Mogakolodi Masibi van die Batlharo Boo Tokwana-Ba-Ga-Masibi- tradisionele gemeenskap het ook ’n afskrif van hierdie memorandum by die historiese Turnhalle-gebou, die voormalige setel van die tribunaal in Windhoek, onderteken as ’n simbool van hul beroep op die SAOG.

Die ondertekening van die memorandum op 18 Maart was die finale stap in die tweeledige trek wat Freeth op 28 November 2023 by die hek van die plaas Mount Carmel, in sentraal-Zimbabwe, begin het. Hy het te perd van dié plaas ongeveer 800 km ver deur Zimbabwe gereis en daarna wes langs die Caprivi-strook in Namibië. Vandaar is hy tot in Windhoek waar die ondertekening plaasgevind het.

Freeth en sy skoonpa Mike Campbell het in 2001 ’n uitsettingskennisgewing van die Zimbabwiese regering ontvang slegs twee jaar nadat dié regering bevestig het dat Campbell se plaas Mount Carmel nie vir die regering se grondhervormingsprogram bekom gaan word nie. Campbell en Freeth het dié grondonteiening sonder vergoeding-saak in die Hooggeregshof in Harare beveg, maar was onsuksesvol. Hulle het dit daarna na die SAOG-tribunaal geneem wat in 2008 in Campbell en Freeth (en ander boere wat by die regsaksie aangesluit het) se guns beslis het. Dié tribunaal het bevind die Zimbabwiese regering het die SAOG se beginsels van menseregte geskend en het beslis die boere het die reg om hul plase te besit en te bewerk.

Die Zimbabwiese regering, onder leiding van voormalige pres. Robert Mugabe, het dié beslissing egter geïgnoreer. Mount Carmel is beset en Campbell, Freeth, hul plaaswerkers en hul gesinne se huise is in 2009 afgebrand. Die regerings van die SAOG het daarna besluit om die werksaamhede van die tribunaal op te skort.

Volgens Freeth was hierdie tribunaal oop vir enige SAOG-burger wat deur die regstelsel in hul land in die steek gelaat is. “Die effektiewe sluiting van die tribunaal was ’n verwringing van die gereg wat meer as 400 miljoen burgers in 16 SAOG-lande van geregtigheid ontneem het.”

Daarom is daar ook in die memorandum versoek dat die SAOG-tribunaal weer opgerig moet word om as ’n waarborg te dien vir die beskerming van menseregte, die oppergesag van die reg en veral eiendomsreg, die reg om te leef, vryheid en ongebondenheid.

Volgens Barend Uys, hoof van Interkulturele Verhoudings en Samewerking by AfriForum, het ’n herstelde SAOG-tribunaal ’n noodsaaklike rol om te vervul om vreedsame naasbestaan en ’n vry, veilige en voorspoedige toekoms vir alle kultuurgemeenskappe in Suider-Afrika te verseker – veral in gevalle waar geregtigheid aan gemeenskappe en individue in hul eie lande geweier is.